詩人墨客最鍾意遊山玩水，享受大自然，大詞人蘇東坡亦唔例外，佢當年去到赤壁，被眼前美景所折服，感嘆江上清風、山間明月「是造物者之無盡藏也，而吾與子之所共適」。不過咁，如果大詞人穿越時空嚟到今日嘅香港，發現大眾共享嘅清風明月被人霸佔牟利，咁就唔止詩興盡失，直情谷氣到爆喇。
唔係講笑，漁護署轄下四十一個免費開放畀市民使用嘅郊野公園營地，長年被人佔領，節假日期間更係爭崩頭，好似前排十一假期吖，原本只有十個營位嘅西貢灣仔南營地竟然出現過百個帳幕，當中不乏拖篋嘅外地遊客，好多市民大清早入到去已經冇晒位，失望而歸，唔勞氣就假。
傳媒早前報道，有內地旅行社以香港深度遊作招徠，一早搵「專業戶」去營地為旅客「落釘」霸位，而本港地頭蟲亦唔執輸，見有利可圖，照辦煮碗，再向市民「賣位」，熱門假期仲索價一千蚊一個營位添，無本生利好過去搶。漁護署亦證實不斷接獲相關投訴，由四年前嘅三宗急升至去年嘅二十宗，比前一年上升三成三，都咪話唔驚人。最匪夷所思係，即使有圖有片，漁護署都有本事話調查後未有發現違規情況喎，信不信由你，反正好多人唔信喇。
嗱，法例規定未經許可喺郊野公園內出售或出租任何商品或物品，均屬違法，最高可判罰款二千元及監禁三個月。好明顯，漁護署隻眼開隻眼閉，任由公共郊野資源被一小撮人霸佔，即係縱容不法，有冇再離譜啲吖。咪以為霸佔營地好小事，其實同權貴鄉紳霸佔官地起屋圖利，性質上冇乜分別。所以話啫，香港土地問題愈演愈烈，由房屋到營位都無一例外，咪就係多得港產官僚不作為甚至變相鼓勵囉。
講真吖，香港背山面海，郊野公園唔止風景優美，而且交通方便，出門半粒鐘就由石屎森林進入原野，呢啲優勢連外國都及唔上，絕對係寶貴嘅旅遊資源，好嘢自然多人爭，管理都係要與時並進。可惜吖，漁護署到今時今日仲係採取營地先到先得制度，預約制度到家陣都係得個噏字，雖然當局幾年前推出過「港人港營」，畀香港居民預早入紙申請使用營地，點知好快就無以為繼，咁就難怪亂象同民怨一年甚過一年。
睇到喇，香港社會問題千頭萬緒，歸根究柢就係港府無能。家陣已經係互聯網時代，網上預約絕對有得諗，偏偏港府思維仲停留喺恐龍時代。不過又冇乜好奇怪嘅，堂堂特首都唔知八達通點用，要港產官僚解放思想喎，咪即係異想天開。