政情：「政治係咪黑暗」 張曼莉畀學生考起

符傳富最深刻被問教育議題

張曼莉透露，學生直言受電視影響，以為從政者必須擦鞋先上到位，而嗰名學生亦有意從政，但就唔想擦鞋囉。咁點答呢？佢就回應話工作做法係個人選擇，即使喺私人公司亦有機會面對呢種抉擇，而且擦鞋都唔係代表一定上位，而佢亦都講明從事政治艱難同複雜，因為要留意唔同嘅範疇。

雖然張曼莉遭考起，但佢好勤力將所有問題記低，若然要匯報都有功課交，嚇到早已走訪三間學校嘅運輸及房屋局政治助理符傳富一額汗！不過，符傳富都有做總結，睇嚟同樣做足工夫喎。佢仲透露，印象最深刻就係教師問教育議題，而佢能夠搬出教育新資源等多項教育政策，睇嚟都夠熟書去應對非擅長題目喎。