政情：鍾國斌自備秘密武器抗拉布
喺泛民拉布底下，立法會幾時表決高鐵西九龍站實施一地兩檢提出嘅無法律約束力議案都係未知之數，班建制派議員都要輪流出嚟抖吓氣，而自由黨黨魁鍾國斌（Felix）估計今日都要繼續再戰，屆時仲會出秘密武器添！
戴蠱惑眼罩
為咗避免發言拖住審議進度，Felix話自由黨未必會發言，就算講都講少少算啦，唔係就拖到好夜都仲未有得表決。咁秘密武器係乜嘢？原來佢一早準備好一個眼罩，上面印咗對好精靈嘅眼仔，無論泛民點樣拉布，拉到半夜都可以扮吓嘢抖吓先。
睇住建制派議員逐個出嚟抖，Felix仲即刻話「你睇，聽日就變喪屍o架啦，喺入面有排等o架」。被問到有冇買最新嘅遊戲機玩，可以消磨吓時間，Felix話仲係打緊Candy Crush，但依家都係打到一千七百幾關，唔夠今日壽星女麥美娟勁，打到二千六百幾呀！