政情：麥美娟生日願望 通過一地兩檢方案
立法會尋日繼續辯論，由政府就高鐵西九龍站實施一地兩檢提出嘅無法律約束力議案，而工聯會多個工會喺朝早到立法會示威區請願，喺示威區撐場嘅工聯會議員麥美娟（Alice）就畀人踢爆尋日牛一，係四十六歲生日，連生日都要喺立法會度過，佢嘅生日願望係啲乜？
Alice話今年嘅生日願望當然就係快啲通過一地兩檢方案，而尋晚收工都係返屋企同姪女一齊慶祝。唔知Alice係咪想通過咗議案，今晚就可以順便慶祝埋？而仲係單身貴族嘅佢，今年有冇意思搵番個男友，佢就話屋企兩隻狗仔就已經好足夠。
真係「兩個就夠晒數」？Alice話兩隻愛犬都係狗囡，都係「麥小姐」跟佢姓，一隻叫「麥糖」，一隻叫「麥棗」。兩隻狗個名都咁甜，Alice生活都一定好Sweet啦！
羅致光都係尋日牛一
咁啱又係尋日生日嘅仲有勞工及福利局局長羅致光，班同事就喺辦公室送上蛋糕，賀佢六十四歲生日，佢嘅生日願望又係乜嘢呢？唔通係希望快啲搞掂取消強積金對沖？