政情：防流會倡復編更梁美芬冇人撐
社民連梁國雄等六人被DQ立法會議員資格後，建制派欲趁民主派人少修改《議事規則》杜絕拉布，而民主派揚言要拉布至明年三月進行補選，而拉布行動更喺上月立法會首次大會已開波，仲搞到流會添！建制派議員梁美芬就想重新實施建制派更表，輪流留喺立法會會議廳，以防因唔夠法定人數開會而流會，而「休更」嘅議員又可以離開會議廳。不過，多名建制派議員都話更表制度以前都實行過，但一樣都會流會，所以覺得唔可行咁話。梁美芬畀人大潑冷水，唔知會唔會嬲嬲呢？
民主派由本年度立法會首次大會已開始拉布，會上不斷要求響鐘點算會議法定人數，搞到建制派好似坐監咁被迫留喺會議廳，每小時只能集體離開會議廳「放風」唔多於十五分鐘。有建制派人士就透露，有議員希望可以好似上一屆立法會咁制訂更表，唔使搞到一開大會就全數建制派議員都要坐定定喺會議廳，可以喺立法會大樓辦公室工作，甚至走出大樓同業界或市民見面，但其他建制派對制訂更表就似乎反映不大。
經民聯議員梁美芬就係贊成制訂更表嘅其中一人，話以前都有成功例子，的確可以防止因唔夠人而流會，而且編更表就唔使人人坐晒喺會議廳，可以出去做吓其他嘢，質疑建制派正、副召集人，即係議員廖長江同陳克勤怕麻煩先至唔肯。
得幾個走到 編嚟冇意思
雖然梁美芬力撐編更表，但另一資深建制派、工聯會議員黃國健（KK）就唔係咁諗。KK話如果編咗更表就等同發放訊息，守喺立法會只係建制派責任，泛民係唔需要開會，而過往亦有編咗更表依然流會嘅失敗例子。佢又話如果要防止流會，就要有至少三十六人喺會議廳先至「保險」，而建制派連埋立法會主席梁君彥，亦只有四十多人，故只有幾個人走得甩，編嚟都冇意思。
唔單只係KK，就連本身同梁美芬係黨友嘅工程界議員盧偉國都唔認同梁美芬嘅建議，認為過往民主派拉布，都會承諾留低幾個人喺會議廳，並唔需要三十五人全數為建制派，但依家民主派只會留低一個，點完人數後更加係一個不留，如果建制派四十人要留三十五個喺會議廳，都冇咩更表可言喎。連黨友都唔撐自己，睇怕梁美芬都係要乖乖地疊埋心水留喺會議廳喇！