中環出更：梁天琦合流羅哲斯唱衰香港

羅哲斯引述彭定康說法圖開脫

另一方面，羅哲斯將成立新組織專門監察香港人權等狀況，佢喺Facebook留言引述末代港督彭定康稱，有關舉措非外部干預。以上呢番說法講都冇人信，因為佢哋指手畫腳嘅用意，已經係路人皆見。

今次報告涉及香港過去廿年一國兩制嘅落實情況，梁天琦、羅哲斯等人喺英國上議院一個會議廳出席記者會齊聲「唱衰香港」，其中梁天琦聲言，一國兩制保護香港嘅希望已幻滅，又批評西方社會冇留意香港公民社會追求民主嘅困難愈來愈大；羅哲斯聲稱，香港更大危機在於更多年輕從政者被判囚，銅鑼灣書店多人「被失蹤」事件，認為咁反映香港嘅人權、自由情況正在轉差。

一直主張港獨嘅梁天琦今次同羅哲斯合流，認真耐人尋味，事關羅哲斯早前被揭若然成功來港，行程之一包括同當時仍喺監獄服刑嘅香港眾志主席羅冠聰同秘書長黃之鋒會面，最終因為羅哲斯被拒入境香港才未有成事。立法會議員葛珮帆批評梁天琦等人不斷到外國「唱衰抹黑香港」，只為企圖以海外聲音誤導港人，製造混亂及分裂社會，推動港獨搞亂香港。

卓妮