中環出更：武則天穿越時空 胡曉明打造Superhero

講緊嘅係本月十日至十二日喺中環遮打花園舉行嘅第一屆「山西節」，胡曉明尋日話今次以「穿越時空，晉港一家」為主題，採用主題遊樂園方式，讓大家體驗同認識山西根祖文化。

山西商會副會長兼山西節籌備委員會主席張寬年話，會場當日會蓋上一個面積廿米乘十六米嘅大型帳幕，畀入場人士透過最新虛擬實境（VR）技術，睇下有中國十大奇險建築之一嘅「懸空寺」，帳幕內仲可以睇到3D技術製作嘅「壺口瀑布」畫作，而山西歷史人物例如武則天、關羽和霍去病等，則以「超級英雄」嘅形象向大眾展現。

胡曉明（右）同張寛年（左）都希望加深港人對山西嘅認識。（徐家浩攝）

灣仔區議員伍婉婷（左）唔係山西人，但都加入山西商會，同真正來自山西嘅李毅杰（右）一同擔任秘書長。

其實山西同港人亦好有淵源，因為山西位處中原地帶，唔少姓氏嘅源頭就係嚟自山西。胡曉明話自小聽到長輩話族人源自山西，於是佢就任山西商會會長之後，就同香港中華總商會永遠榮譽會長霍震寰及其家人，到山西霍家村進行尋根之旅，結果對方成功造訪先祖嘅發祥地，然而山西有冇一條胡家村呢？胡曉明就話搵唔到。

張寬年話山西好多唐代建築

內地有句說話「地下陝西，地上山西」，意思係指陝西多出土文物，山西嘅土地上面就有好多歷史建築。張寬年話唔好以為欣賞唐代建築要飛到日本，其實山西亦有好多氣魄恢宏嘅唐代建築物，上世紀中國學者梁思成就喺山西搵到唐代木建築，推翻日本學界話中國不存唐代建築物嘅說法。

山西商會常務副會長孫旭峰就話山西距離香港唔係好遠，搭飛機約兩個多小時就可抵達山西省省會太原市，而下星期舉行嘅「山西節」，唔使搭飛機同高鐵就可以領略山西風情，市民應該把握機會嘞！

卓妮