坐視家長捱貴奶 推廣母乳得把口

嗱，有團體比較過全球四大奶粉製造商銷售嘅四百幾款十二個月以下嬰兒奶粉，發現喺十四個國家同地區當中，本港奶粉售價普遍高過歐洲同澳洲等地。其中一款喺香港發售嘅奶粉最貴，以兩至三個月初生嬰兒食用量計算，每月需花費約二千三百港元；即使選用價格最平嘅品牌，每個月支出亦達九百元之多，都咪話唔重皮。

可能有人會話，自由市場，一個願賣一個願買，冇咩問題啫。咁就大錯特錯嘞，正如負責調查嘅團體話齋，香港奶粉之所以賣咁貴，其中一個重要原因係奶粉公司為迎合市場偏好，推出愈來愈多標籤有不同「功能」以及價錢更貴嘅奶粉配方。

大家打開電視睇吓就知，啲奶粉廣告吹到天花龍鳳，BB飲咗後上至天文下至地理，無所不曉，幾乎叻過愛因斯坦咁滯。消費者聽埋聽埋潛移默化，話冇受影響就呃你嘅。幾年前本港鬧奶粉荒，好多人都將矛頭指向內地客大手掃貨，港府亦迫於群眾壓力推行「限奶令」，但原來根據消委會嘅調查，好多奶粉供應基本正常，而缺貨率高達九成及七成嘅兩款產品，同時亦係宣傳得最多嘅名牌，可見廣告效力何其宏大。

弊就弊在好多廣告誇張失實，好似有款益生菌奶粉，成日吹噓可以幫助BB便便，查實只係對成年人同長者有幫助；又例如PhD，從來冇證據顯示可以增強嬰幼兒免疫力以及智力發展。

講真，奶粉無論營養點豐富、功效點繁多都好，都冇可能同母乳相提並論，更何況母乳餵哺可以提升親子感情，有助降低媽咪患癌機會。事實上，為推廣母乳，唔少西方國家嚴格限制奶粉賣廣告；幾年前美國聯邦政府就曾控告某大奶粉商廣告不實。反觀香港，相關規管大歎慢板，千呼萬喚下當局最近至推出指引，點知又係半桶水，一大堆豁免條款唔在講，仲要係自願性質，根本係形同虛設；至於推廣母乳，更加係得啖笑，好多政府建築物連一間餵哺室都冇，更遑論其他私人場所，環境咁唔友好，家長想轉餵母乳障礙多多，最後惟有焗住幫襯奶粉商，話唔係官商勾結都冇人信。

難為官老爺開口埋口叫人生多啲，連家長捱貴價奶粉嘅問題都解決唔到，直頭食塞米。話時話，功夫茶有時都希望啲奶粉真係好似廣告吹得咁神奇，起碼官僚飲咗都可以醒少少吖！