政情：馬斐森處理投訴戴耀廷「走佬快回覆龜縮」
身為律師嘅立法會議員何君堯喺約半個月前去信香港大學，促港大回覆是否對涉擾亂社會秩序嘅佔中發起人、港大法律系副教授戴耀廷啟動正式調查程序。何君堯喺Facebook貼出馬斐森上周四嘅回覆，不滿對方嘅答案仍然非常含糊，再次去信要求清晰回應是否正式處理其針對戴耀廷嘅投訴。有網民諷刺即將離開港大嘅馬斐森「走佬就快，回覆極慢龜縮」。
無正面回應 網民狠批
馬斐森喺回信中無正面回應係咪跟進涉及戴耀廷嘅投訴，僅稱港大會按既定程序去處理教職員嘅事宜。一批網民留言力撐何君堯繼續跟進到底，批評馬斐森以拖字訣回應，試圖令有關戴耀廷嘅投訴不了了之；另有網民更指，今次事件屬於大是大非問題，港大絕不能含糊其辭，否則予人「明顯地支持違法（行為）」，屆時港大高層需要為此問責下台。