政情：萬聖節派對 猜猜Groot是誰？
尋日係Halloween（萬聖節），嘩鬼出籠，都咪話唔驚。而早幾日喺一個Halloween Party中就見到Groot（樹人），大家估吓佢係邊個？
仲估唔到？咁又係嘅，成個頭套遮晒，剩番兩隻眼，點估呀？其實佢就係立法會前建築界議員謝偉銓（Tony）囉！嗰日仲撞正佢牛一添！
撞正謝偉銓生日
Tony日前牛一，仲喺Facebook上載咗幾張相，佢助手貼文話因為老細鍾意食朱古力，就特登買咗個朱古力蛋糕畀佢食，而夜晚佢就去參加咗一個Halloween Party，參加者全部都cosplay，唯獨佢一個着住老西，佢仲話：「我就梗係唔使扮喇，生日大晒o架嘛！我打算騎劫萬聖節party變成我生日party。」
睇怕都係騎劫失敗嘞！唔知係在場嘅參加者嫌Tony太正經，抑或Tony忍唔住都要扮吓嘢，於是佢就笠咗個Groot嘅頭套，算係過吓癮、應吓節咁話喇！
話時話，姚松炎被法庭DQ立法會議員資格後，好多人都估Tony會捲土重來，但佢只係話積極考慮，仲未表態話會參與補選。唔知佢仲要諗幾耐呢？