政情：低調深耕 謀撼白鴿 王紹基子承父業？
政界向來有唔少一齊從政嘅父子兵、父女兵等，呢股潮流近年蔓延至十八區區議會層面，最新例子係九龍城區議會前主席王國強同佢大仔王紹基（Ivan），最近Ivan創立咗一個名為「城社」嘅平台，落戶九龍城做地區工作，據聞王國強好支持Ivan，密謀力撼今年初由民協過檔民主黨（白鴿黨），喺九龍城嘉道理選區當選嘅當區區議員蕭亮聲，Ivan依家對係咪參選仍然三緘其口，未知係咪驚見光死會被重點狙擊，寧願低調密密做好過。
近年多隨王國強參與區內諮詢
「子承父業」嘅政壇例子愈來愈多，最終選舉結果有人歡喜有人愁，近年最為人熟悉嘅隔代「子承父業」例子，就係立法會前議員陳鑑林（橄欖）同長子陳俊傑，話說橄欖早年喺觀塘區議會坪石選區當選，而喺約十年前，曾交棒畀當年仲未加入政府「熱廚房」嘅陳百里，當陳百里辭職加入官場後，終由橄欖長子陳俊傑出選坪石選區並當選，從某個角度嚟講，陳俊傑係延續父親喺社區嘅服務。
據聞再有類似「子承父業」例子喺兩年後區議會換屆選舉上演，今次嘅主角係王國強同大仔Ivan。仲記得王國強當年以委任區議員身份進入九龍城區議會，其後更獲支持當選九龍城區議會主席，因此喺當區有一定江湖地位；除咗王國強喺地區服務多時，Ivan近年亦疑似跟隨父親步伐，參與區內唔少諮詢架構，令Ivan落戶九龍城區議會參選嘅消息傳得似層層。
冇正面回答會否參選下屆區議會
當問及會唔會從政並劍指下屆區議會選舉，Ivan接受查詢時冇正面回答，但答案令人有唔少聯想空間。佢強調自己對九龍城好有感情，細細個已同呢區密不可分，事關家族喺區內服務咗三代人，爺爺王錦輝係九七回歸前嘅區事顧問，父親就喺區議會及政府委任架構服務多載，佢希望通過「城社」做多啲社會創新、國際文化交流研究，承傳祖輩所做嘅工作，凝聚社區人士。
除此以外，同樣有機會繼承上一代從政，有已故「三料議員」吳明欽嘅女兒、白鴿黨吳思諾，據報佢有意落戶太子選區，同兩年前自動當選嘅當區區議員丁健華一較高下，由此觀之，Ivan、吳思諾等人嘅從政第一擊能否一擊即中，除咗自身喺地區深耕細作，當時嘅政治氛圍亦都有一定影響，真係福禍難料嘞！