政情：單身政助馮興禮 香港上海兩層樓揸手
港府三名新任副局長同政治助理喺網上公開佢哋嘅利益申報資料。其中年僅三十歲、仍屬單身嘅勞工及福利局政治助理馮興禮，申報喺香港南區同上海靜安區都擁有住宅物業，前者用作自住，同另一家庭成員各佔一半業權，後者現時空置，由佢個人持有。佢同時申報為香港賽馬會、香港中華遊樂會同香港日本人俱樂部嘅會員，相當「有米」。
蘇偉文擁住宅車位出租
政制及內地事務局政助吳璟儁申報喺元朗擁有一個自住物業，由佢同太太鄭悅朗各佔一半業權。吳太同佢老公曾喺同一間電視台任職，現職為立法會公共資訊主任。
運輸及房屋局副局長蘇偉文申報喺觀塘區擁有一個住宅物業同一個車位，兩者現時用作出租。佢又申報身兼「香港專業及資深行政人員協會」會員同「香港中文大學聯合書院校友會」幹事，其太太則已故。