政情：僭建唐宮 還原攞獎 如同殺人後救人
前政務司司長唐英年位於九龍塘約道嘅大宅僭建地下「唐宮」，喺二○一二年二月中、即一二年特首選舉投票前一個月曝光，「唐宮」內部設施極盡奢華，當時全城嘩然，地庫除咗酒窖同品酒室，仲有專業洗頭椅，另有私家游泳池，其池底設有玻璃等。事隔多年，原本僭建「唐宮」已還原並重新裝修設計，尋日獲得香港建築師學會頒發「評審特別獎——會長獎狀」。其實，唐英年僭建「唐宮」違規後可以得獎，情況猶如「殺人後救人」，相當諷刺。
重新裝修 建有蓋天橋連接兩屋
約六年前唐英年辭任政務司司長，宣布參選一二年特首選舉，佢喺競選期間被揭發其位於九龍塘嘅大宅有過千呎僭建地庫，猶如地下「唐宮」，備受批評，而佢喺特首選舉落敗後，亦喺一三年「補鑊」，向屋宇署申請採用自建磚牆方式密封僭建地庫，據報直至一五年間，「唐宮」終還原並重新裝修，單係以石屎填回僭建部分需要一千萬元，佢一家亦重新入伙。
本來僭建「唐宮」已遠離傳媒視線，惟冥冥之中有注定，僭建「唐宮」尋日再度成為政圈焦點。話說建築師學會公布一六至一七年年獎，其中一個得獎作品名為「橋接房子」，項目嘅負責建築師為「施正建築師設計有限公司」同「區兆堅建築及工程設計顧問有限公司」，再翻查資料更發現，原來呢個得獎作品正係位於九龍塘約道5A及7號，呢個地點就係當年僭建地下「唐宮」嘅所在地。唐英年曾向傳媒透露，今次裝修起咗條有蓋天橋連接兩屋，天橋入面仲有冷氣添，一般相信，呢個就係今次得獎作品「橋接房子」名稱嘅由來嘞！
唐英年喺五年半前選輸特首，尋日竟然「翻身」有安慰獎，之不過建築師學會公布年獎嘅記者會，唔見唐英年捧場，只有負責「唐宮」新設計嘅兩名建築師合夥人現身，佢哋透露涉及僭建嘅地庫係用輕石屎填平，因此結構冇影響，再三強調依家係單位設計完全合法。我哋尋日亦到過現場視察，由於依家「唐宮」嘅牆身甚高，因此難以窺探大宅內嘅最新情況。
違規後獲頒「安慰獎」 相當諷刺
其實唐英年自從失落特首寶座後，本來都沉寂咗一段時間，惟近期又似有重新活躍迹象，除咗今次僭建「唐宮」還原後重新設計有獎攞，情況猶如「殺人後救人」般諷刺，及至最近，唐英年又獲政府「翻叮」為西九管理局董事局主席，究竟唐英年再次活躍政圈是福是禍？時間將會證明一切。