中環出更：黃之鋒出獄 唔適應手機筷子背囊
法庭日前批准香港眾志秘書長黃之鋒保釋等候上訴後，黃之鋒尋日喺Facebook貼文講出獄感受，指自己對手機、筷子同背囊都唔適應，仲話出獄後嘅節奏唔可以好似入獄前咁急促，亦喺獄中領悟到有時步伐要緩慢啲。
黃之鋒喺貼文中話當日下午四點恢復人身自由嗰一刻，就開始發現自己不太對勁。佢話手握嗰部「久別重逢」嘅電話，開機嗰刻係有種莫名其妙嘅陌生感，居然諗：「點解呢舊嘢會發光嘅？」
而喺前日朝早食公仔麵時，「看到在高度設防監獄六十天裏，從未見過的筷子（害怕囚犯用這個自殺），發現原來可以用筷子也是得來不易……，還有剛剛打算出門口時拿起背囊，終於不用帶着監房的手攜包頭袋，而可以背着東西四處行走，感覺很……幸福（可見監獄的環境是會如何降低一個人對生活的渴望或需求）。」
希望恢復正常生活
佢承認出獄後嘅節奏唔可以好似入獄前咁急促，而喺在囚好一段日子後，真係需要時間適應。佢仲話喺獄中領悟到有時步伐要緩慢啲，畀自己有多啲時間沉澱，佢又希望呢幾日調整身心，恢復一般人嘅正常生活。
卓妮