中環出更：「年年有今日」梁天富又造人成功
早前沙田馬場舉行客家盃賽馬日，逾二千五百名來自世界各地嘅客家人齊齊入馬場，認真墟冚。博愛總理梁天富同太太Tina都有入場，佢笑笑口自爆太太又有咗，預產期係明年五月，所以預告明年八月將要擺百日宴。嘩！今年七月佢先至為大仔擺百日宴，咁快又造人成功？富哥笑稱，因為喺大仔百日宴上，有老友祝佢「年年有今日」嘛！
其實梁天富早已預咗要追多個，為大仔搞百日宴時，已經好幽默咁同嚟唔到嘅朋友講：「唔緊要，出年再嚟喇！」個個以為鍾意講笑嘅佢開吓玩笑啫，估唔到佢真係講得出，做得到添！佢身旁嘅香港客家總會副主席梁錫光都戥佢開心。
各地鄉親來港出席客家盃
今次客家盃係由香港梅州聯會（聯會）贊助，事關聯會會長余鵬春係今次「世界客屬懇親大會」嘅籌委會聯席主席。當日出席者來自世界各地，包括馬來西亞客家公會聯合會總會長張潤安、加拿大客家聯誼會會長李國賢，同埋身兼世界客屬總會名譽理事長嘅台灣新竹縣縣長邱鏡淳等人。
余鵬春話今次入馬場嘅二千五百幾人之中，本地客家人只係幾百人。話時話，咁多客家人來港，實帶來唔少旅遊收入，佢就笑稱冇計過，不過淨係酒店都訂咗六間咁多。聯會副會長丘瑞真、余鵬春太太余徐菊霞同家姐余小春都有到場。余小春一連幾日幫手做義工，佢話呢兩日行路行到腳跛，未試過對腳咁痛，不過鄉親由世界各地專程嚟到，幾辛苦都無所謂喇！
卓妮