中環出更：羅樂風傳承之道 杜絕二世祖勿做大閘蟹
由傳承學院舉辦嘅傳承大獎早前舉行頒獎典禮，九位得獎者現身說法交流傳承之道。其中亞洲三大成衣製造商之一嘅羅樂風家族獲頒「香港家族傳承大獎」，羅樂風係「針織大王」羅定邦嘅長子，佢話中國人成日話富不過三代，所以點樣避免製造「二世祖」好重要，佢仲大方分享傳承之道。
四十幾年前，羅樂風同太太自立門戶創立製衣集團，現時喺全球共有廿間廠，亦已成功由二代全面接棒。佢話若果唔想令下一代變成蛀米大蟲，就唔可以好似大閘蟹咁，將所有家庭成員綁埋一齊，咁樣好容易製造一班靠家族信託基金而生存嘅二世祖。佢哋設有家族委員會，以家族約章取代家訓，咁就可以令家族成員之間嘅氣氛和諧啲、自由啲，大家用分享而唔係說教嘅方式去溝通。
陳浩弘笑稱未夠班攞大獎
「經典家族傳承大獎」得主係印度裔夏利里拉家族，該家族長子嫡孫夏大衛代表出席領獎。「家族慈善傳承大獎」就由孫少文基金會獲得，基金會主席孫燕華（Chloe）同媽媽、仁濟醫院總理孫蔡吐媚及細佬孫明豐齊齊去領獎。Chloe話企業傳承嘅唔止係財富，價值觀都好重要，佢就係秉持住「正、善、誠」去傳承家族慈善企業。
學院主席陳裕光同個仔陳浩弘都喺度，原本自己創業嘅陳浩弘預告下年將幫手打理家族生意，事關佢連生三個仔，要畀啲時間照顧屋企人。佢笑稱未夠班攞傳承大獎，不過就完成咗陳家姓氏嘅傳承喇！
卓妮