雖然大家對女神嘅定義冇劃一嘅標準，但係總會有一個公認嘅準則，就係要樣靚身材正兼且有氣質，而南韓模特兒柳多妍再加多一項，就係有智慧。雖然今時今日仲講美貌與智慧並重，好似有啲老土，但事實上呢種內外兼備嘅魅力，足以令男士神魂顛倒。
2015年柳多妍初次喺模特兒界登場，唔少人都稱佢做美艷女神，事關佢唔單止擁有迷人嘅樣貌，仲有前凸後趷嘅火辣身材，加上長腿嘅魔力，稱佢做女神一啲都唔過分。早喺在學時期，柳多妍已經兼職模特兒工作，雖然當時取得一定人氣，但係為咗學業，冇耐佢決定暫別呢個行業。不過作為一位擁有如此優秀外在條件嘅索女，又點可能浪費天賦本錢呢？另一方面，一直以嚟對模特兒工作抱有野心嘅佢，其實從未放棄過喺模特兒界發展嘅夢想，2014年佢便重返模特兒界。
可能有人會問想做就可以做咩？最重要都係睇吓有冇模特兒事務所肯簽噃。呢方面對柳多妍嚟講，絕對唔係問題，正如先前所講，喺佢在學時期已經擁有一定嘅知名度，加上隨住年齡增長，身材變得更加玲瓏浮凸，女人味亦愈來愈濃，當佢去到模特兒事務所時，對方已立刻同佢簽約。成為職業模特兒之後，喺事務所安排下，佢先接過幾個攝影模特兒工作，跟住好快就獲得公開演出嘅機會，以車模身份喺車展上為汽車品牌站台。雖然話係初次演出，但係阿妹本身有相當嘅經驗，所以一啲都難佢唔倒，而憑住大方又淡定嘅演出，加上個人嘅氣質，呢次處女演出獲得極佳評價，不但令佢身價水漲船高，同時紅遍南韓網絡，更獲網民冠以美艷女神嘅稱號。
自此之後，柳多妍嘅工作接踵而嚟，除咗進行各類型攝影模特兒工作外，亦經常喺各個大型車展中見到佢嘅身影，同時佢踩入賽車女郎界化身成性感美艷賽車女郎，成為賽場上亮麗嘅焦點。不過佢嘅野心並唔止於此，及後做埋遊戲展嘅Show Girl，並獲得遊戲生產商嘅垂青，擔任遊戲代言人，近年更衝出南韓，喺外國嘅遊戲展中登場。隨住曝光率及人氣不斷攀升，唔少人對佢都感到興趣，事關作為一位既有樣貌又有身材，兼且有氣質嘅索模，點解可以如此完美呢？當大家深入探究後卻發現，原來阿妹嘅學歷相當高，畢業於韓京大學，擁有經營學學士學位。柳多妍表示，佢一直想保持低調，認為作為模特兒界一員，希望大家以佢嘅表現嚟評價，若然下下將學歷掛喺嘴邊，反而會令人有博宣傳之嫌。
既然係修讀經營學，點解唔朝住商界發展，而走去做模特兒呢？柳多妍曾經夢想成為一位商界強人，不過自從接觸過模特兒工作後，卻發現原來商業管理亦可以應用喺模特兒工作上，例如如何營運自己嘅模特兒事業，而將來引退後，亦可以營運一間模特兒事務所，發揮所長。如此一位既有外在又有頭腦嘅索模，試問又點可能唔叫佢一聲女神呢？
簡介：柳多妍最為人矚目嘅身體部位，相信非一對迷人巨乳莫屬。事實上，佢一啲都唔吝嗇喺大家面前展現火辣身材，不過佢唔係每次都會露出深溝，最重要係要配合攝影同演出嘅主題，否則會有喧賓奪主嘅感覺。如果大家想了解佢多啲，就要Click入呢個網站喇！
網址：http://cafe.daum.net/yudayeon
出生地：京畿道平澤市
身高：174cm
三圍：34-25-35
撰文：魂