沉默不是懦弱，忍耐不是麻木。反對派政客成日扮晒「為民請命」、「替天行道」，實際上有破壞冇建設，淨係議會搞拉布，阻住地球轉，已經得罪成村人。呢嗱，尋日又有市民忍唔住出嚟遊行示威，支持修改《議事規則》剪布嘞。
都係市民心水清。淨係上一屆立法會之嘛，點人數已經點咗一千五百次，耗費二百幾小時並造成十八次流會，公帑因此唔見近一億元。更加大鑊嘅係，因拉布而導致嘅工程超支數以十億元計，示威者因此要求議員唔開會就要扣人工同津貼，唔係冇道理o架。
大家有眼睇，呢幾年嚟反對派政客係又拉布唔係又拉布，連基建工程、教育撥款、醫委會改革等民生議題都唔放過，搞到神憎鬼厭，之不過佢哋佔據關鍵少數席位，港府及建制派一直吹佢哋唔脹咁解嘅啫。好嘞，家陣反對派被DQ咗六件，建制派冇理由放過機會，三十幾名議員聯署要求修改《議事規則》，建議包括大會主席有權整合議員修訂案，並提高議員呈請書門檻；另一方面，財委會主席提出議事指引，一場剪布Vs拉布嘅攻防戰正式展開。
當然喇，「拉布」係反對派最重要嘅政治武器，絕對唔會坐以待斃。尋日議事規則委員會開會，部分反對派議員走去踩場，要求列席會議，仲一度企圖強行闖入，場面一片混亂。最好笑嘅係，佢哋口口聲聲「保障知情權」，查實同道中人喺裏面開會已經將實況用臉書播通街，你話係咪做騷咁做吖。
反對派政客反剪布嘅理由嚟嚟去去三幅被，無非都係話建制派「乘人之危」、「大石壓死蟹」。枉佢哋自稱「民主派」，民主就係少數服從多數，哪怕百分之四十九對五十一都冇得傾，況且「DQ六人組」宣誓玩嘢，咎由自取，與人無尤。再講吖，拉布騎劫大多數市民利益，淪為少數人嘅暴政，早就應該撥亂反正喇！
樹欲靜而風不止，反對派衝擊會場唔成功，肯定唔會善罷甘休，據聞下一步係透過肢體行動反對喎，唔通想學台灣議會咁，講口兼講手？大家應該聽過經濟學上「路徑依賴」嘅理論，人一旦喺行動中獲得甜頭，就會不斷重複，難以自拔，當初反對派拉布拉冧五司十四局，咪食髓知味係咁嚟囉；「暴力問政」同樣係一條不歸路，三十年前朱高正揮出台灣議會第一拳，之後暴力不斷升級，甚至發展到有立委衝上部長辦公室踢門，結果係點有目共睹，社會撕裂，內鬥內耗，不斷沉淪退步。香港好學唔學學台灣，盞自己攞嚟衰嘅咋！