反中亂港有運行，呢句說話近日再次靈驗！外號「民主阿婆」、經常出訪西方國家「唱衰中港」嘅前政務司司長陳方安生，尋日透過發言人發表聲明，話好榮幸獲得一個美國機構，頒發名為2018 O'Connor Justice Price嘅獎項，佢更會喺明年二月親自飛往美國鳳凰城領獎。
該獎項以已退休嘅美國高等法院首位女性大法官Sandra Day O'Connor命名，專門表揚一些「在推動法治、公正、人權方面有非凡貢獻」嘅人，民主阿婆係歷來第四位得主，之前三位得主分別為美國前總統卡特、西班牙前外長Ana Palacio，同埋前聯合國人權事務高級專員Navaethem Pillay。
民主阿婆喺回歸前為港英殖民地政府一員，鮮有聽聞佢對香港嘅民主人權有何貢獻，到回歸後佢失勢離開政府，先至「忽然民主」，周遊列國「唱衰」中國同香港，令佢同「漢奸黎」壹傳媒黎智英、「李漢奸」民主黨創黨主席李柱銘，以及一直反對中梵建交嘅天主教香港教區前主教陳日君，合稱「搞事四人幫」。
當近年唔少香港年輕人都已記唔起民主阿婆呢類「舊電池」，想唔到遠喺美國仲有人對佢念念不忘，並加以褒獎，令人覺得貶低咗之前三位得獎者。