政情：梁志祥口輕輕 請泛民食九大簋？
近年社會關注生態保育，立法會議員梁志祥（祥哥）尋日就擔任生態旅遊嘅導賞員，帶傳媒參觀南生圍嘅生態環境，準備咗有圍村特色嘅九大簋宴客！話時話，近排泛民喺議會拉布成風，導致上星期四立法會流會，建制派與民主派之間更加係「戰況」激烈，唔知祥哥有冇興趣喺立法會擺番幾圍九大簋請議員食，修補雙方關係呢？
祥哥覺得呢個方法唔錯，話可以同民主派會議召集人莫乃光傾吓。但佢又話元朗屏山同位於金鐘嘅立法會都有一段距離，運送方面會有困難，拎到返嚟都可能凍晒。係咪得個講字呢？
唔驚油膩 有輕食之選
不過，佢透露間中都會帶啲黨友嚟食，但係葛珮帆（EQ）係食齋，而黃定光（象哥）就有三高問題，九大簋同盆菜都係偏油膩，咁佢哋咪有得睇冇得食？祥哥話唔使驚，因為九大簋中都有輕食之選，所以EQ同象哥都唔使怕無份食喇！