政情：唔認Plan B游蕙禎死亡之吻嚇怕社運男？
因宣誓風波而被取消議員資格（DQ）嘅青年新政游蕙禎，早前透露可能會支持一位同路人，出戰喺明年三月十一日舉行嘅立法會九龍西選區補選，暗示另一DQ議員劉小麗同其他民主派人士應「讓路」畀該位神秘參選人。尋日有報道指嗰位人選係活躍於社運圈子嘅袁健恩，但袁隨即澄清自己係「社民連之友」，否認係青政成員或游蕙禎「Plan B」（後備）。唔通佢怕咗游蕙禎嘅支持會變成「死亡之吻」，令佢得失其他民主派及被選舉主任DQ？
袁健恩本身唔係咁出名，但原來佢爸爸係有「佔中牧師」之稱嘅袁天佑，曾高調支持佔中同下令開放教堂收留佔領人士。袁健恩本人就幫過游蕙禎助選，不時參與社民連同香港眾志嘅活動，早前佢喺街頭舉牌反對高鐵一地兩檢，游蕙禎同前學民思潮發言人黃子悅都曾經到場幫佢打氣。佢接受網媒訪問時承認，正考慮參加九西補選，並曾與游蕙禎作過初步討論。
貼文撇關係 自稱「社民連之友」
參選消息曝光後，袁健恩立即喺社交網站貼文，否認自己係Plan B，從未加入青政，亦冇做過眾志義工，形容自己係「社民連之友」。不過，佢並冇否認自己有意參選九西，有網民更留言叫佢唔好「笠水（臨陣退縮）」。
部分泛民唔撐青政 認咗冇着數
須知青政同眾志被視為本土自決派，在明在暗支持香港獨立，社民連則被指係「大中華膠」，即係並唔支持港獨。加上游蕙禎一早講過，佢同青政如果公開表明支持某位候選人，隨時會變成「死亡之吻」，令對方被當作支持港獨，而遭選舉主任取消參選資格。袁健恩急急澄清自己係「社民連之友」而非游蕙禎Plan B，可能就係為咗通過選舉主任嗰關。
除咗劉小麗同袁健恩，民協立法會前議員馮檢基、民主黨深水埗區議員袁海文，以及公民黨前成員曾健超等，均曾表態或盛傳有意參加九西補選。由於部分民主派唔支持港獨嘅青政為同路人，拒絕按「被DQ者優先」嘅原則讓路畀青政或其支持嘅人選，需要另行協調或舉行初選。因此就算袁健恩直認係游蕙禎Plan B，喺爭取出線方面亦唔會有着數，反而可能會流失部分溫和民主派嘅支持。
建制派早已協調好由民建聯深水埗區議員鄭泳舜出戰九西，現已周街賣晒廣告同日日落區宣傳拉票，唔知非建制呢邊仲要拗幾耐呢？