政情：不滿洋人搞戲曲 馬逢國撐汪明荃
日前西九文化區正式委任方美昂（Alison Friedman）為表演藝術總監，同時領導戲曲、舞蹈、戲劇及音樂等團隊。八和會館主席汪明荃其後發聲明，表示對安排不滿。身為西九管理局董事、以及體文界立法會議員嘅馬逢國認為，汪明荃嘅關注完全有道理，仲話會向當局反映，至於當中嘅問題就仍然需要再作研究。
稱未參與招聘遴選
馬逢國尋日話，自己雖然係西九管理局董事，但並唔係管理局高級管理人員同董事局成員所組成嘅招聘委員會成員，亦未有參與遴選。佢自己就唔傾向聘用太多非本地人士，但如果有關人士擁有一啲特質，能夠培養本地藝術人才嘅話，佢都會接受喎。
而汪明荃尋日再以八和會館主席身份發正式聲明，澄清冇質疑方美昂嘅成就及藝術行政能力，並冇對佢國籍同種族有任何意見，只係西九提供嘅資料未能顯示對方對傳統戲曲有深入認識，佢認為傳統戲曲應該有自己專設同有實權嘅藝術總監，以照顧戲曲嘅發展需要。