政情：葉國謙獻屎橋 累流會犯眾怒
立法會大會前日流會收場，底蘊係政府突然提出要抽起印花稅草案議程，以確保一地兩檢動議可如期喺下周三「打尖」進行辯論。事件不但激起溫和民主派也加入拉布行列，部分建制派亦對政府做法有微言，認為抽唔抽起印花稅草案其實冇咩分別，政府咁做令佢哋無辜地承受拉布之苦。有身兼行政會議成員嘅建制派立法會議員更爆料指，原來係民建聯行會成員葉國謙提議政府抽起議程，質疑佢對新一屆立法會嘅形勢同生態已經脫晒節，獻計變咗獻屎橋。
前日流會建制派到底係有心定無意，至今眾說紛紜，但肯定係有個別建制派議員，被響之不盡嘅點算人數鐘聲搞到無心戀戰，喺通過中止待續印花稅草案後放軟手腳，繼而引發流會。
事後有人踢爆，抽起印花稅讓步畀由運輸及房屋局局長陳帆負責嘅一地兩檢嘅做法，係由曾任立法會建制派「班長」嘅葉國謙喺行會會議上提出，並獲政府採納；呢個亦係民建聯十二名議員前日全部坐定定開會，力撐抽起印花稅議案嘅原因。
印花稅草案本毋須抽起
反對抽起議程嘅建制派議員指出，印花稅草案獲各黨派支持，並已通過二讀進入全體委員會審議階段；加上政府已讓步接納議員意見，同意將樓換樓退稅期由六個月延長至九個月，照計應可於周三同周四兩日會議內完成三讀，即使唔抽起議程都唔會影響下周三嘅一地兩檢動議。佢哋質疑葉國謙無事生非，令包括民主黨主席胡志偉在內嘅民主派，有藉口發動拉布，建制派無端端要被拉布折磨。
不過，亦有政府中人為葉國謙解畫，指出民主派早已表明會運用一切手段阻撓高鐵一地兩檢，即使佢哋本身支持印花稅草案，估計亦會藉此拉布以阻延一地兩檢動議；而事實上，中止議案最終獲得通過，政府可如期喺下周三提出一地兩檢動議，雖然其後爆出流會鬧劇，但成個行動整體尚算成功。
至於政府今次係咪「贏了戰役，輸了戰爭」，為咗一項動議而犧牲未來幾年嘅行政立法關係，就真係見仁見智喇！