中環出更：梁錦松扮司機 自嘲偷步買車
政制及內地事務局前局長譚志源（Raymond）早前加入咗前財政司司長梁錦松創立嘅集團，兩人唔止拍住搵真銀，仲一齊拍宣傳片。話說官場上曾經係Raymond上司嘅梁錦松，竟然「淪為」Raymond嘅司機，負責載Raymond返去教會，梁錦松更喺教會被問起當年因「偷步買車」而下台事件。雖然呢啲情節其實只係梁錦松同Raymond為教會活動而拍嘅宣傳片，不過梁錦松扮司機的確係入型入格。
與譚志源為教會拍宣傳片
喺宣傳片段中，戴帽嘅梁錦松載Raymond到教會，後來更發現原來兩人都係去同一教會嘅。教會裏面有人問梁錦松︰「係唔係因為曾經因一啲車嘅問題衰咗而信耶穌？」暗指佢任財爺時嘅「偷步買車」事件，片段中梁錦松有啲尷尬咁答「唔係」。
梁錦松不惜出賣自己嘅「黑材料」用來拍片，其實係因為佢和Raymond都係基督徒，所以一同幫手宣傳下月底嘅教會活動啫，又真係去得幾盡喎。
卓妮