中環出更：撳掣發言忘詞？ 謝偉俊教路 停一停 諗一諗
立法會不時邀請學校及團體到立法會大樓作音樂表演。尋日中午就輪到心光盲人學校一班學生哥表演，一眾議員都有出席，其中議員謝偉俊（Paul）及蔣麗芸（Ann）更隨住音樂扭動身體打拍子，甚為投入。小朋友對立法會似乎充滿好奇心，有小朋友問Paul，如果按咗發言按鈕但又唔記得咗想講乜嘢，咁點算好？Paul就笑笑口話︰「要停一停、諗一諗」，仲話下次可以提早用紙仔寫低發言內容。睇嚟呢啲都係Paul嘅經驗之談喇！
金融界議員陳振英、議員田北辰（田二少）、譚文豪及立法會秘書長陳維安等人都有去欣賞。小朋友表演完之後，一眾議員仲留低同佢哋傾偈。其中有學生問Paul，議員座位係唔係有好多按鈕，Paul都逐一解答。佢更代表立法會向學校送贈紀念品，而小朋友亦都有向在場人士派發有凸字嘅鎖匙扣。
田二少同小朋友玩 一臉慈祥
調皮嘅田二少就叫一班小朋友聽吓佢把聲，估吓佢究竟幾多歲。小朋友喺職員姐姐「提水」之下，就紛紛話田二少係二十五歲，田二少就回答︰「聽我把聲都唔止啦！」跟住叫小朋友再估多一次，於是啲小朋友就估佢應該係七十歲。已經有孫仔孫女嘅田二少露出一臉慈愛笑容，回答︰「差唔多喇。」田二少雖然未夠七十歲，但今年都有六十七歲喇，睇嚟呢班小朋友都幾心水清喎。
卓妮