政情：梁栢賢學生相 見證「40年不變」
醫院管理局行政總裁梁栢賢（PY）經常喺Facebook上載照片，博取大家一笑。繼早前上載身穿太空衣嘅相片後，PY尋日又出新招，上載自己嘅陳年學生相。由於佢個樣變化唔大，就有網友形容佢「四十年不變」喇！
慶祝中學畢業40周年
PY話尋日係中學畢業四十周年，一班同學正籌備慶祝活動，借機敍舊同重拾年少無知嘅情懷，睇嚟佢都係出於呢個原因而大話當年喇。由相片可見，PY坐得非常端正，但褲腳就好似過短，仲有眼利網友指出佢當時髮腳過長添！
另外，PY喺相中坐喺第一排老師嘅隔籬，有網友就估計佢當年有料到，仲係乖學生，因為只有班長先有機會坐呢個位。不過，網友最關心嘅都係佢嘅樣貌變化，有網友就讚佢外表「四十年不變」，所以一眼就認得出，更有人盛讚依家嘅PY仲後生，真係非常誇張。唔知大家有冇同感呢？
