政情:何君堯講完殺無赦再講斬頭

立法會議員何君堯早前發起集會,要求香港大學開除違法佔領行動發起人、港大法律系副教授戴耀廷,大會期間更作出要對主張港獨者「殺無赦」嘅言論,引起外界爭議,有非建制派議員更動議譴責何君堯。何君堯近日喺社交網站直播時再次有惹人注目嘅言論,佢撐要修改議事規則防止拉布時,話要令民主派知道頭上有把刀,「稍為做得唔好就斬頭」。

促建制趁上風修例 否則就「戇居」

何君堯喺直播中指出,泛民鍾意以關鍵少數挾持議會,要同佢哋達成協議,「武器要在手」,依家建制派有能力同佔政治上風嘅時候,一定要搶攻,必須喺未來兩三個月內搞掂修改議事規則,否則後患無窮,「你如果依家呢個時候,你揸住支槍,你唔去箝制住、要支配住佢哋呢,日後你放低支槍嘅時候,支槍佢揸住,隊住你呢,你就戇居、笨蛋嚟o架啦」。

佢又暗指民主派係動物,話自己對住非建制派一年,「佢班友仔趷起條尾,我就知佢哋屙硬定屙爛」,相信對方一定會就修改議事規則拉布,自己亦預咗加會,「唔掂搞到掂」,若能修改大部分議事規則內容,將拉布、無謂嘅點算(人數)或行為不檢加重刑罰,「佢哋(民主派)頭上知道有把刀呢,稍為做得唔好就斬頭」。

話泛民動議譴責言論好無謂

對於有議員動議譴責佢嘅「殺無赦」言論,佢話自己短期內會寫信畀民主派,叫大家認清動議「好無謂」同浪費立法會時間,又質疑「究竟你哋攻擊何君堯係借題發揮吖,還是係想去支持港獨嘅問題,還是你哋係想撥亂反正,將社會不良嘅風氣嚟糾正」,如果佢哋咁做係為攞彩或者「祈求狗餅」嘅話,實際上係徒勞無功嘅。

對於近日建制同泛民已協調立法會各委員會正副主席人選,近日喺內會已經舉行選舉,何君堯就話,若果自己係班長或主事人,一定會全取正副主席,因為非建制派一定會拉布,雙方雖然已協商正副主席位置,但對方仍「厚顏無恥」地希望搶內會主席位置,喺唔夠票下花咗成粒鐘時間,形容泛民太無賴,建制太無謂,「你同呢班咁嘅禽獸去做呢一個deal,係無可能嘅」。

第一手消息請下載on.cc東網iPhone/iPad/Android/Windows Phone Apps