政府將青年事務委員會「升格」，稍後成立青年發展委員會，有青年組織尋日批評由六十六歲嘅政務司司長張建宗擔任主席，形容係「家長式」領導，又質疑委員會只屬諮詢性質並無實權，青年意見恐成「花瓶」，要求設立青年議會，下放權力畀年輕人。老實講，以前青年事務委員會已被批評好多「老餅」，後來加入咗多啲年輕人亦唔見得有乜唔同，不難令人懷疑青年發展委員會只係舊酒新瓶，當然要事先警告張建宗喇！
