政情：楊哲安三代同堂「企街」過中秋
中西區議會山頂同東華兩個選區嘅補選已接受報名，盛傳將代表自由黨出戰山頂嘅楊哲安，繼早前喺網上貼舊相力證自己係山頂居民後，佢喺前日中秋節晚就企喺舊居所在嘅麥當勞道，向揸車路過嘅山頂街坊打招呼，呢次仲係三代同堂一齊揮手添，認真大陣仗。
同山頂街坊揮手拉票
楊哲安星期三晚喺Facebook上載咗一幅相，做過立法會議員嘅爸爸楊孝華、楊媽媽、太太張新悅同埋三個囡囡等都喺相入面。楊哲安喺相附上標籤話「楊家三代同堂過中秋」，但楊家過中秋似乎有獨特嘅方式，皆因佢哋團圓唔係喺屋企，唔係去酒樓，而係齊齊「企街」，喺掛有楊哲安頭像嘅易拉架前，同一班街坊揮手拉票。
不過，網民反應似乎好壞參半，有人叫楊哲安「Add oil（加油）」，但另一邊廂亦有人形容佢「以為係油站搵promotion」。無論網民點睇都好，楊哲安亦承認今年呢個中秋節好難忘。