政情：譴責動議變新戰場 何君堯成狙擊目標
近年泛民同建制派立法會議員之間嘅矛盾愈來愈多，譴責動議似乎成為佢哋嘅新「戰場」。自舊年十月開始，立法會已先後提出兩宗譴責動議，對象分別係熱血公民鄭松泰同民建聯（民記）嘅周浩鼎，泛民又計劃喺立法會復會後提出譴責動議，今次嘅狙擊對象係早前對主張港獨者發表「殺無赦」言論嘅獨立建制派議員何君堯，而何則反批泛民是非不分。
葛珮帆直指動議好無聊
香港本土立法會議員毛孟靜尋日指何君堯嘅言論違反立法會議員應該秉持嘅操守同履行嘅職責，計劃十月十八日喺立法會上提出譴責動議，而內務委員會今日討論有關事宜。
何君堯隨即喺Facebook反駁，指譴責動議肯定係錯嘅，又指提出嘅毛孟靜等人是非不分。佢表明：「不擔心譴責動議，因為他們是不會成功的」，又奉勸該等議員應多做實事、多做好事，唔好浪費納稅人嘅金錢同立法會嘅時間。民記另一名議員葛珮帆直指動議好「無聊」，並指自己將會反對議案。
鄭松泰舊年十月喺立法會會議廳內涉嫌將五星旗同區旗倒插，其後議員謝偉俊曾就事件提出譴責動議，及後周浩鼎被揭涉嫌與特首梁振英「打龍通」，按梁振英意見修改專責委員會擬議調查UGL範圍，毛孟靜亦提出譴責動議，現時兩個動議均成立專責委員會處理。