政情：清積壓議程 改會議程序 陳健波分途出擊剪布

喺立法會休會前，財委會喺泛民拉布下，僅通過教育新資源撥款、多間醫院重建及擴建工程等，至於東涌新市鎮擴展、中九龍幹線、公務員加薪等多項議程則仍未通過，其時已經有聲音批評，泛民拉布令公務員未能趕及在暑假前獲加薪，基層公務員最受影響。

政綱盼財委會重回正軌

要解決財委會拉布問題，就必須修改財委會會議程序，陳健波喺社交網站發布一段影片，為競逐財委會主席而拉票，講明政綱係希望財委會重回正軌，令財委會可以做實事，如果能夠連任，會着手處理財委會審議拖延撥款嘅問題，提出修改財委會會議程序，以減少拖延嘅機會。

不許議員提出「休會待續」

陳健波早前已經表明會建議修改，包括限制議員提出臨時動議的數目、行為極不檢點嘅議員，一旦被趕離會議室同日不得回席、不再容許議員提出「休會待續」，以及刪減縮短表決鐘時間的辯論環節。

相關嘅建議相信引起非建制派反對，預計審議需時。為咗唔好再阻礙審議積壓嘅議程，據聞，陳健波決定以財委會特別會議去處理修改財委會會議程序，預計會喺星期一、二、六開會，唔會佔用星期五財委會嘅時間，而特別財委會亦唔會一開始就先處理修改會議程序，而會先處理立法會議員朱凱廸早前提出要求檢討涉及「基本工程儲備基金」嘅撥款機制。

陳健波以雙軌會議去處理積壓議程同修改會議程序，咁樣計落，公務員加薪就唔會受修改會議程序影響，如果非建制派唔再喺積壓嘅議程故意拉布，相信公務員加薪就有望喺今年內通過嘞！