中環出更：揸隻鴨燒兩個鐘 陳沛然呻攰到爆
十一連中秋一連幾日長假期，立法會醫學界議員陳沛然（Pierre）亦都趁長假期陪三個寶貝女去露營，仲親自燒鴨畀佢哋食添！Pierre話為咗燒好呢隻鴨，佢揸住隻鴨足足兩個鐘，簡直係全日最大運動量喎。
話仲辛苦過燒乳豬
Pierre早兩日同太太、三個寶貝女去咗長洲露營，當日係團體活動，大會派咗五隻鴨，Pierre負責燒其中一隻。Pierre話以前佢都試過燒乳豬，但都冇燒鴨咁辛苦，因為要全程揸住隻鴨嚟燒，每五至十分鐘就要幫隻鴨轉身，真係攰到爆。
雖然辛苦，不過都係值得嘅。Pierre話當晚除咗燒鴨，只有燒腸仔等平時燒嘢食嗰啲食物，所以最好食就係鴨喇！問到燒得咁辛苦，三個囡囡有冇報答番，Pierre就苦笑話佢哋食完就跑咗去玩喇喎。
卓妮