中環出更：鍾尚志武俠癡 同阿媽鬥快睇小說
有人話閱讀習慣要自細培養，香港中文大學醫學院前院長鍾尚志就係一個例子。佢尋日出席一個閱讀分享會時就自爆，自己鍾意睇書鍾意到「冇書就唔聚財」，而佢睇書嘅習慣同媽媽有關，因為以前媽媽會租武俠小說，佢亦都因此好鍾意睇武俠小說，由於媽媽一租就租廿本，但係好快就要還，所以佢同媽媽仲會鬥快睇小說添！
鍾尚志尋日同太太杜雁碧一齊出席活動。鍾尚志話屋企個書櫃乜嘢書都有，講運動、管理、釣魚等佢都啱，但最鍾意都係武俠小說，特別係《笑傲江湖》同《射鵰英雄傳》，不過自己寫書呢個夢想，就係喺巴布亞新幾內亞工作時先達成。佢話當地生活節奏好慢，喺等候幫病人做手術時佢見到環保紙就拎嚟寫吓，咁就完成咗佢第一本書、記載行醫點滴嘅《刀下留人》。佢仲講笑話練好支筆好重要，有醫術了得、教書教得好嘅同事就因為發表論文數目唔夠，所以喺評審升職時吃虧喎。
陳美齡講教仔唔可以做嘅嘢
同場仲有早前傳出獲邀加入政府「熱廚房」嘅居日香港女歌手陳美齡（Agnes）同埋本地小說作家余兒。啱啱出版咗自傳嘅Agnes透露原來佢又有新作，係一本講教仔嘅日文書，會講教仔唔可以做嘅嘢，例如打鬧小朋友同比較，因為會令小朋友學到暴力同埋令小朋友自卑喎。而呢本書佢個大仔仲會寫感想，所以佢都好期待咁話。而Agnes亦喺日本出咗一本有關世界上小朋友嘅真實故事，佢話呢本書已有出版商表示有興趣譯做中文。話唔定不久將來就有中文版面世，到時香港讀者都可以睇到喇！
余兒：要保留原著人物同骨幹
余兒之前都有作品被拍成電影，被問到點樣先係一部好嘅改編作品，佢就認為要保留原著人物同骨幹，如果可以保留到六、七成嘅原著，另外三、四成因應媒體再加入新嘢，觀眾都覺得好睇就係好嘅改編作品。
卓妮