係人都知，狗出名對主人忠心，咁走狗又點呢？睇吓香港記協就知嘞，對餵佢狗餅嘅主子忠心耿耿，搖首擺尾，對主子以外嘅人，唔使主子出聲就齜牙咧嘴作咆哮狀，魯迅話叭兒狗往往比主人更嚴厲，又開口中喇。
呢，一個由洋人管理兼名不見經傳嘅本地網媒，據稱過去兩個月斷斷續續收到幾封恐嚇信，最近一封仲寄去洋總編嘅英國老家添。即係咁，香港係法治之區，只要有足夠證據，警方唔會對違法行為坐視不理嘅，咁洋總編報警後，事情就好應該交由警方負責嘞，但奇怪嘅係，記協好似判官上身咁款，第一時間撲出嚟表態，指指點點，乜嘢「對事件感到震驚」，乜嘢「要求警方嚴肅徹查」，乜嘢「確保香港新聞工作者免於恐懼」喎，講到大義凜然咁款，想唔讚句好戲都唔得吖。
記協之所以咁肉緊，咪就係食咗主子派嘅狗餅囉，咪就係受人錢財替人消災囉。係人都知，洋媒最buy就係唱衰香港嗰一套，即係爛果報日日話香港陷入威權管治，反對派日日話受到政治打壓嗰啲廢話，記協不嬲同壹淫媒及反對派沆瀣一氣，唔加多兩錢肉緊唱衰香港點得吖。仲有喎，反對派同記協都係聽命於一個人嘅啫，咪就係漢奸黎囉，今次呢單恐嚇案由爛果報率先爆出，記協聲明緊隨其後，邊個係主子，邊個係奴才，仲使問嘅。何況走狗奴才見到金髮碧眼嘅洋人即刻跪低一直係中國傳統，作為走狗嘅走狗，記協雙膝一軟又有乜出奇。
咁講喇，如果記協一視同仁，為所有受恐嚇嘅同業發聲，咁就係應有之義，可惜事實並唔係咁。有網民就講得啱嘞，東方記者被漢奸黎爆粗辱罵兼公然恐嚇，全城關注，記協偏偏好似食咗啞藥咁，後來頂唔住壓力先至叫東方記者報警喎，漢奸黎個臭名連提都唔敢提，乜嘢叫做「恐嚇面前，雙重標準」，記協就係人辦嘞。
又好似壹淫媒大搞「假自僱、真裁員」吖，漢奸黎畀員工鬧爆「契弟」，但對於呢啲「賣伙記落火坑」嘅行為，記協一樣扮晒鵪鶉，小罵大幫忙。反觀壹淫媒同反對派有咩頭暈身(興)就唔同講法嘞，記協不單止第一時間噓寒問暖，仲使出看家護院嘅本領亂咁吠，唔到你唔服o架。如果有忠心走狗比賽，記協認第二，肯定冇人敢認第一啫。
話時話，記協「舐奸」舐得咁出位，舐得咁出汁，舐得咁無恥，有名你叫「妓協」就係咁解。咪話唔提醒，自古歡場無真愛，今日漢奸黎係就係一擲千金嘅恩客，但呢條契弟連親生仔都可以插草大平賣，他日一樣可以對妓協始亂終棄嘅咋，到時妓協唔知仲可以舐邊個呢？