政情：背向民意 反一地兩檢 泛民搞唔起

政府要喺高鐵西九龍站實施一地兩檢，就要經「三步走」方式實施一地兩檢方案，包括同內地簽訂相關合作協議，全國人大常委會十二月開會時批准及確認方案，再於明年初於立法會進行本地立法工作。港府前日就公布將會喺本月二十五日嘅立法會大會就一地兩檢提出無約束力動議，尋求立法會支持實施一地兩檢，不過講明冇約束力，所以都係象徵意義大於一切。

關注組替代方案無說服力

相比政府頻頻出招先發制人，民主派似乎苦無對策，遲遲都未能將一地兩檢嘅討論喺社會升溫。例如由民主派發起嘅一地兩檢關注組一直雷聲大雨點小，佢哋早前大鑼大鼓提出嘅「內地一地兩檢」替代方案了無新意，亦都欠缺說服力，遭到有關方面「冷處理」。

另一方面，民主黨議員尹兆堅（肥尹）及資訊科技界議員莫乃光（Charles）原本計劃喺本月十八日立法會大會提出一地兩檢口頭質詢，佢哋尋日自爆，收到立法會秘書處通知，話因為政府已表明會就一地兩檢提出動議，所以根據《議事規則》，佢哋嘅口頭質詢就有可能唔批喇。

肥尹同Charles聽到秘書處嘅「溫馨提示」，梗係出嚟鬧爆政府，又質疑政府係特登「出口術」，等立法會冇得再討論一地兩檢，封殺立法會討論空間。當問及佢哋係咪會堅持唔更改質詢內容時，佢哋兩個都話未決定，肥尹仲明言擔心如果唔改質詢內容，立法會主席梁君彥會唔批，結果喪失一次口頭質詢機會，「賠了夫人又折兵」。

話時話肥尹所屬嘅白鴿黨，喺反對一地兩檢嘅立場亦惹人聯想，相比之下，白鴿黨嘅反應無其他民主派政黨走得咁前，例如白鴿黨林子健早前聲稱被擄事件後，外界質疑點解呢件事咁啱得咁蹺，喺討論一地兩檢方案嗰陣發生，白鴿黨當時再三強調唔好將事件同一地兩檢扯上關係，有人事後回想，或者一切並非偶然。

民調亦普遍支持一地兩檢

除此以外，過去一段時間嘅民意走向亦甚為一致，由民建聯、自由黨就一地兩檢進行嘅民調顯示，基本上有多於一半嘅市民支持一地兩檢方案，就算被視為親民主派嘅港大民研，佢哋八月嘅調查結果都顯示近五成三人支持政府方案。

據聞民主派內部亦有就一地兩檢進行民調，結果亦同已曝光嘅民調差唔多，因此難以民調作為反對一地兩檢方案嘅「武器」。由此觀之，基於喺天時、地利及人和都無明顯優勢，民主派嘅反對一地兩檢聲勢搞極都搞唔起，長此下去，反對一地兩檢陣營嘅影響力只會持續萎縮。