中環出更：吳宏斌畀膽 鼓勵珠寶商北上
早前一個喺國際珠寶界享負盛名嘅珠寶大獎喺香港舉行，來自世界各地嘅業界人士濟濟一堂。中國黃金協會副會長周桃林都有到場，佢間公司係內地最大嘅黃金首飾加工製造商，每年賣出黃金高達一百五十噸，難怪同場嘅中華廠商聯合會副會長吳宏斌（斌哥）叫佢做「中國金王」。斌哥話，內地人口多，市場大，若果夠膽做，成功機會好大，所以呼籲本港珠寶商放膽北上打品牌。
點解周桃林間公司一年可以賣咁多黃金首飾？一句講晒「人多好辦事」。周桃林話，內地近十四億人口，淨係結婚、生仔送金飾嘅習俗，佢就有排做，前幾年銷量甚至達二百幾噸添！咁佢會唔會考慮喺香港開零售店？佢笑笑口話暫時未有打算。
斌哥就話，內地人消費力好高，所以近年有好多珠寶商有興趣做番內地零售市場。佢認為，過往香港珠寶商喺內地設廠多數着眼出口，冇睇重發展內地市場，或者唔敢放膽去做，結果錯失咗隨着內地經濟發展而壯大嘅時機，認真可惜。
周美麗盼提升業界社會參與
同場仲有香港珠寶製造業廠商會主席杜源寧、香港金銀首飾工商總會會長簡健光同上海鑽石交易所總裁林強等業界猛人。主辦今次活動嘅大會主席周美麗話，亞洲嘅珠寶製造商好叻做價廉物美嘅首飾，但係對管理及履行社會責任方面就冇咁注重，佢希望藉住舉辦獎項令業界走出單打獨鬥嘅格局，從而提升業界嘅社會參與咁話。
卓妮