香港地就係咁奇怪，一方面大批無殼蝸牛望天打卦等上樓，另一方面大量土地閒置養蚊，作為全港最大地主嘅港府卻起勢呻「地從何來」，你話係咪吹脹吖！
有關注團體聯同建築系學者進行研究，建議將閒置校舍改裝，再加設組合屋設施，用嚟提供過渡性房屋。佢哋以閒置近十年嘅觀塘道前聖約瑟英文中學為藍本，話只要拆卸校舍非主力牆，再直接安裝一百個預製組合屋，只需一年半時間左右，就可以為三百八十名基層市民提供臨時居所。正如負責研究嘅學者話齋，興建公屋淨係改劃土地用途，閒閒哋都要兩年以上，反觀閒置校舍基本排污、消防設施，以至交通等配套設施一早就位，真係有得諗o架。
話時話，類似閒置校舍用地，全香港共有一百八十幾幅，其中唔少位於市區靚地，只可惜港府唔識地盡其用，好似上述校舍咁閒置十年已經唔算最誇張，有啲近四十年都無人問津，有啲就由教育局「生人霸死地」，遲遲唔肯交還政府，結果連審計署都忍唔住炮轟，真係唔到你唔服。
冇錯，相對於十幾萬劏房戶以及近三十萬公屋輪候大軍而言，改裝閒置校舍解決唔到大問題，但無殼蝸牛水深火熱，已經去到為求有瓦遮頭，連「上床下廁」、「棺材屋」都唔放過嘅地步，喺咁嘅情況下，幫得一個得一個，幫得兩個得一雙，港府絕對責無旁貸。再講吖，閒置校舍只係官地被浪費嘅冰山一角，再加埋其他平租明益權貴嘅私人會所、廢車場、被霸官地以至未開發嘅棕地……呢度安置幾百個，嗰度安置幾千個，真係幫得到好多人o架。
當然喇，唔理係改裝閒置校舍，抑或係收回其他官地起屋，以至港府最近提出嘅共享房屋又或者貨櫃屋，統統都係權宜之計，解決房屋問題，治本之道始終係增加土地供應。港府近排大鑼大鼓成立土地供應專責小組，聲稱要就開拓土地優次凝聚社會共識，怕就怕築室道謀，三年不成，等到真係傾得埋欄，落手落腳搵地，規劃等在在需時，起得屋嚟都係十年八載之後嘅事。仲有吖，港府話就話冇既定立場，但就畀人質疑委員會成員立場側埋一邊，支持政府開發郊野公園者有之，主張填平水塘者有之，萬一結果只係同政府背書，到頭來肯定又係爭拗不斷，盞攞嚟搞嘅咋。
為政不在多言，顧力行何如耳。港府開口埋口「寸土必爭」、「見縫插針」，改裝閒置校舍相對爭拗細而可行性高，官老爺肯唔肯積極回應、拆牆鬆綁，正正就係試金石。