政情：補選冇人上 新思維鬧劇一場
中西區山頂選區同東華選區出現議席空缺，今日起接受報名，唔少有意參選嘅人士早已表態，新思維主席狄志遠早前話，唔排除最終由佢本人或兩名副主席鄭承隆同黃俊瑯出選山頂區，但相隔只有短短兩日，黨內截止報名前，都無人報名有意參選，新思維最終決定唔會派人，認真係鬧劇一場。
新思維早前表明黨內有人想挑戰山頂區議席，並會喺稍後決定人選，但新思維主席狄志遠尋日發新聞稿，指至尋日中午十二點，黨內截止報名前，最終都無人報名，所以新思維喺山頂區同東華區都唔會派人出選。
承認區內支持度不足
狄志遠又話部分考慮參選嘅會員擔心，參選會令到同其他政團嘅關係更矛盾，影響日後合作，又認為喺區內支持度唔夠，對今次未能游說會員參選感到失望，但尊重會員對政治形勢嘅判斷。兩日內有咁大嘅變化，唔知係咪黨內評估得唔夠仔細呢？