政情：麥鄧碧儀退而不休 義助IT界
生產力促進局總裁麥鄧碧儀今個月底就退休，離開擔任長達七年嘅崗位。佢尋日出席活動時被問到退休在即有咩感想，佢明言心有不捨但始終要放手喇！
麥太透露，退休後先抖抖再考慮下一步，但旅行充電並非必須，而且已計劃日後做義工，繼續喺科技方面作貢獻，尤其對培育年輕人最感興趣。佢仲話呢七年工作不斷，即使只剩一個月時間，工作依然緊密，例如月中要就「工業4.0」尋找合作夥伴，而依個禮拜本來要去外國演講，但認為要進行交接而取消，睇嚟總裁工作一啲都唔輕鬆。
尋日活動係將曾經隨神舟十一號升空嘅蠶蟲後代，捐贈畀提出「太空蠶」嘅中學飼養，並附上養蠶說明書同指引添。麥太都話蠶蟲需要潔淨環境生長，當時克服唔少困難先能夠順利升空，更自爆當日討論咗好耐點樣帶蠶蟲入太空但無進展，仲一度提出放棄添！
捐「太空蠶」後代畀中學飼養
而獲捐贈十二條「太空蠶」後代嘅基督教宣道會宣基中學，該校物理科老師周穎熙就話獲贈嘅蠶蟲品種適應力強，有信心可以成功飼養喇！