政情：加泰獨立公投扯到香港 本土自決派抽水

佢哋發表聲明譴責加泰羅尼亞警方（實為西班牙國家警察）對選民採取武力行徑，認為西班牙政府壓制獨立公投，係干涉言論自由等政治權利，仲借題發揮扯到香港身上，話民主自決係基本權利。不過，對於同樣舉行獨立公投嘅伊拉克庫爾德自治區，佢哋就冇發聲明支持。呢啲算唔算係雙重標準呢？

西班牙加泰羅尼亞日前舉行獨立公投，期間西班牙中央政府以鐵腕手段企圖阻止獨立公投進行，而加泰羅尼亞地區政府官員早前話，九成已投票嘅選民贊成加泰羅尼亞獨立，但西班牙首相拉霍伊早前重申馬德里政府唔承認獨立公投嘅立場。

發聲明話民主自決係基本權利

香港同西班牙大纜都扯唔埋，香港眾志常委林淳軒、朱凱廸同陳志全明明正喺英國訪問，但朱、陳及香港眾志越洋發表聲明回應加泰羅尼亞自決公投事件，除咗譴責加泰羅尼亞警方外，又指透過民主方式實踐自決權，係每個公民嘅基本權利，唔單止喺香港，以至世界各地，人民嘅聲音都需要被聆聽、承認同尊重，而投票權對民主社會極為重要，今次西班牙政府壓制獨立公投，已經干涉言論自由等政治權利。聲明又指出，要向加泰羅尼亞人表達關注，因為佢哋相信連結唔同嘅公民社會，能夠帶來更公義嘅世界。

其實世界上咁多獨立公投，呢班自決派又冇個個都支持喎，好似近日伊拉克庫爾德自治區舉行獨立公投，但自決派就冇發聲明支持，如果根據佢哋對加泰羅尼亞嘅聲明，都應該支持吓庫爾德自治區喇啩？在庫爾德自治區獨立公投臨近，美國表態反對庫爾德自治區舉行公投獨立，自決派亦冇發聲。

無視歷史背景影響 說三道四

講真嗰句，唔同地方都有自己嘅歷史背景，以及不同因素影響，先會舉行獨立公投，正如早幾年克里米亞舉行獨立公投脫離烏克蘭加入俄羅斯，其實都涉及歷史背景同不同原因，呢班本土自決派見到獨立公投就好似啱自己使，係咁狂抽水兼亂咁噏，夾硬扯到香港身上，根本係混淆視聽。