中環出更：徐立之教年輕人 先打工後創業
愈嚟愈多年輕人嘗試創業，尋日喺一個論壇上見到港科院院長、香港大學前校長徐立之，佢都留意到呢種情況，甚至有人中學一畢業就已經創業，但佢覺得創業需要大量經驗，年輕人應該累積科技知識先好創業喎。
徐立之話創業者亦應先做打工仔去認識社會，事關將社會當做讀書時嘅模樣係大錯特錯喎！徐立之就解釋，因為社會競爭激烈，而且唔再有老師保護，睇嚟都係怕年輕人受傷喇！
學生選科功利 錢大康話合理
講起近年嘅大學生選科，大多揀「神科」，浸會大學校長錢大康就話學生選科雖然功利，但以日後生活安定為目標係無可厚非喎。佢其後分析呢個現象，指出現時有六成大學生係佢哋家庭中第一代大學生，所以先會為追求向上流而選擇會計、律師等專業學科，而呢個情況同二戰後嘅美國類似咁話，仲話覺得唔需要作出改變添！
卓妮