中環出更：周伯展：人工智能未可取代醫生
人工智能發展迅速，唔少工作開始被科技取代，咁專業人士係咪一定穩陣？香港專業及資深行政人員協會（專資會）早前舉辦周年晚宴，卓妮見到副會長兼眼科醫生周伯展，佢就認為醫生除咗開藥同做手術外，仲起到安撫病人嘅作用，試諗吓如果做手術嗰陣，間房只有機器而冇醫生喺隔籬，未做都驚啦！
周伯展話科技確實方便咗醫生工作，但唔可能取代醫生，事關醫生除咗要觀察同整合病人生活習慣先診斷到病人患乜嘢病外，手術時仲往往會遇到好多突發情況及變化，須靠醫生即時專業嘅臨床判斷，單靠機器做唔到。佢仲話「醫者父母心」，好多人有病都係心理因素或情緒導致，話「藥能醫假病，酒不能解真愁」，呢啲時候醫生嘅安撫好有幫助。啱啱卸任牙科學會會長嘅梁世民都同意，又話現時有機器掃描病人口腔狀況後可直接打磨出一隻牙套，印牙模都慳番。
陳紹雄話機器會取代「辛苦工」
專資會創會會長容永祺同現任會長陳紹雄當晚忙於招呼賓客，卓妮拉住陳紹雄問佢人手嘅問題，佢都認為好多難請人或辛苦嘅工冇人做，都會被機器取代，淨係現時嘅建築方式都同以前大不同。做物流嘅會員高學亨就話對物流影響更大，一箱貨對客人嚟講係一箱錢，佢哋最想實時追蹤貨物位置，以前要打電話問，過程繁複冗長，又可能會撞正唔同地方時差而問唔到，依家有電腦系統自動不斷更新，上網一睇就清楚晒，慳番極多人手，可以話顛覆咗呢個行業。
會員趙麗娟同孔美琪都有出席，孔美琪唔驚老師工作被取替，趙麗娟就話七、八十年代已深明電腦系統審計嘅重要，而未來社會走向高知識型，bookkeeper簿記或被淘汰，但創意、愛同熱情都係人類最大嘅資產咁話。
卓妮