政情：方國珊自爆攝影狂 每個月拍2萬張
比起以前用菲林嘅年代，依家無論用手機定相機影相好方便，因為唔使擔心買菲林貴，真係多多都唔怕影。西貢區議員方國珊（哪吒）早前出席一個影展時就自爆，自從做咗區議員之後，每日狂影相，一個月有成二萬張相。嘩！除番開即每日平均都有六百幾張，好彩唔使買菲林啫！
哪吒話細細個已經鍾意攝影，佢讀小學時，爸爸就買咗一部單鏡反光相機畀佢，到中學時期更加入咗攝影學會，所以沖相、曬相呢啲嘢都學過，一啲都難唔倒佢。
話鍾意幫老人家「留倩影」
哪吒又話，平時落區或出席公開活動時都會影相，主要都係影居民多，因為佢鍾意幫人「留倩影」，特別係影老人家，因為佢哋好容易滿足，見到佢哋笑，就會好想留住呢啲動人時光。咁似乎哪吒啲相都係人像居多噃？哪吒就話其實佢都有去荔枝窩、印洲塘影風景相，仲講笑話呢啲地方係佢「新界東主場」添。