政情：施俊輝傾偈傾到上郵輪
近年盛行郵輪旅遊，有慈善機構早前就贊助近廿位清貧學生參加一個三日兩夜郵輪之旅，仲喺啟德郵輪碼頭舉行啟航禮。出席活動嘅教育局局長政治助理施俊輝（Jeff）話，自己第一次上郵輪係啱啱考完會考，為咗同幾個好朋友可以傾偈傾通宵，就報咗兩日一夜嘅郵輪之旅。傾偈傾到上郵輪，都咪話唔豪喇！
帶太太同囡囡去沖繩旅行
Jeff話當年幾個好朋友想搞個兩日一夜嘅畢業旅行，當時啱啱興起郵輪旅遊，於是朋友就建議上船。點解要過夜？咪就係為咗可以傾偈傾通宵囉！佢又話嗰時仲細個，如果同屋企人講唔返屋企過夜，屋企人會擔心佢唔知走咗去邊，如果上船玩，起碼佢哋知自己喺船上好安全喎。
依家好多小朋友細細個已經周圍去旅行，Jeff囡囡都唔例外。七月份佢就同太太帶咗當時十五個月大嘅囡囡去日本沖繩旅行。Jeff笑稱，其實都係佢兩公婆想去玩，相信囡囡都冇乜感覺。