政情：日跳3粒鐘 張尹馨激瘦3個碼
女士成日話減肥難，不過香港鐘表業總會前主席高鼎國嘅太太張尹馨（Grace）就輕易甩掉四十磅。早前高鼎國為家族鐘錶品牌舉行活動，Grace都去撐場。多年嚟一直保持圓潤身形嘅Grace竟然大變身，激瘦三個碼，成個人望落後生好多。究竟做過咩嚟？
話老公想佢增番10磅
Grace笑笑口話最近迷上跳舞，日日跳三、四個鐘，見到磅數係咁跌，佢就愈跳愈開心，結果半年之內狂甩四十磅，連衫都要改細三個碼。佢仲即時騷手機入面嘅體重紀錄曲線圖，似足崩盤嘅恒生指數一樣，好搞笑。雖然戰績咁好，不過Grace話老公唔想佢咁瘦，所以要增番十磅。
講番品牌活動，高鼎國話呢隻瑞士品牌引入內地已有八十年，以前嘅宣傳口號係又襟又準，不過依家啲人貪新鮮，太襟用反而唔係好事，有型先至係時代潮流喎。