政情：白鴿黨又鬼打鬼 兩女一男爭九龍西席位
民主黨（白鴿黨）向來鬼打鬼內訌不斷，早前先講過白鴿黨港島及新界東支部爆內訌，佢哋九龍西支部亦都隨時爆出爭位戰。話說白鴿黨司庫、深水埗區議員袁海文一直被認為係該黨立法會九龍西議席嘅接班人，之不過民協接連出現大逃亡，唔少前民協成員都成為白鴿黨招攬對象，盛傳民協前主席莫嘉嫻係其中之一。莫嘉嫻過去一直扎根屬九龍西選區嘅九龍城，如加入白鴿黨勢對袁海文構成壓力，加上白鴿黨九龍西選區立法會議員黃碧雲（一舊雲）未有言退，屆時分分鐘又再爆爭位戰。
一舊雲烏龍事件多到暈
二○一二年立法會選舉時，一舊雲因頂替由九龍西選區轉戰有「超級議席」之稱嘅區議會（第二）議席嘅黨友、現任立法會議員涂謹申，所以出選九龍西，結果成功當選。雖然佢出任議員以來屢次發生烏龍事件，包括喺立法會表決時按錯掣、投錯票，鬧出唔少笑話，不過由於揭發公屋鉛水問題令佢曝光率大增，去年立法會換屆選舉，一舊雲亦總算順利連任。
其實去年立法會選舉，袁海文已經排喺一舊雲名單嘅第二位，故此被認為係九龍西議席接班人。如果唔係被取消立法會議員資格嘅劉小麗有意參加明年三月舉行嘅九龍西補選，民主派或讓路，否則袁海文好大可能提早一嘗做立法會議員嘅滋味添。
莫嘉嫻落區相多人讚好
不過，莫嘉嫻加入白鴿黨一旦成事，袁海文接班一事或會有暗湧。事關六月退出民協嘅莫嘉嫻一直扎根九龍西，之前係多屆九龍城區議員，有一定歷練。早前佢喺社交網站上載喺土瓜灣、馬頭圍派傳單嘅落區照片，都有唔少白鴿黨中人「派like」讚好，仲包括同佢一樣出身九龍西嘅一舊雲添。
之但係政治生態就係你爭我奪，順利連任嘅一舊雲似乎愈戰愈勇，議員席位愈坐愈過癮，未見佢有退位之意。加上一舊雲今年五十八歲，至二○二○年立法會換屆都未攞得長者卡住，所以隨時都會玩多屆。如果係咁，佢同袁海文、莫嘉嫻勢爆爭位戰，到時真係買定花生睇好戲都得喇。