中環出更：山頂人楊哲安 搵陳百強做證
中西區區議會山頂及東華選區因議席空缺而需補選。有意競逐山頂議席嘅行政會議成員兼立法會議員、新民黨主席葉劉淑儀（葉太），早前就暗寸自由黨對手，即立法會前議員楊孝華之子、教育局局長前政治助理楊哲安並非山頂居民。楊哲安就喺社交網站大晒年輕時喺山頂大屋嘅「鑽窿」舊相，更擺埋逝世多年嘅歌手陳百強上枱，話以前經常喺山頂撞見對方，力證自己係山頂居民。
大晒年輕「鑽窿」舊相
楊哲安喺社交網站上載咗幾幅年輕時嘅舊相，包括「職安真漢子」手持電鑽嘅造型，又留言話早年居於山頂麥當勞道時，曾親自將房燈裝上天花板。除咗舊相，楊哲安仲連已逝世多年嘅本港著名男歌手陳百強都拎出來做「證據」，話以前經常喺山頂撞見對方，又話對方當時已經係大明星，仍照舊同山頂街坊打招呼，份人好親切。
面對楊哲安隔空還擊，葉太尋日就話「佢（楊哲安）鍾意講乜就講乜」，又話自己山頂都未必選到，參選只係博一博。而除咗楊哲安同葉太，新思維主席狄志遠亦表明佢哋想挑戰山頂議席，仲話唔排除最終由佢本人或副主席鄭承隆、黃俊瑯出選添。
卓妮