中環出更：內地飲宴奇聞 吳永嘉合埋眼食蜥蜴餐
唔少港商喺內地傾生意，不時要出席飲宴，但有啲特色菜式就未必人人接受到。卓妮早前喺香港國酒茅台之友協會嘅晚宴上見到立法會工業界議員吳永嘉（Jimmy），佢試過喺內地被宴請食烤「全隻五爪金龍」，即係水巨蜥，蜥蜴血仲用嚟溝酒飲添！Jimmy形容呢兩道菜顛覆晒佢嘅飲食觀念，但為免掃主人家興，只好合上眼放入口喎。
烤全隻五爪金龍，就係喺水巨蜥嘅肚附近劏開一半，直接燒嚟食，Jimmy話呢道菜式實在難忘，更令佢驚訝嘅係綠色嘅五爪金龍血竟然同白色嘅酒溝埋一齊。佢話點都要食少少，於是咬兩啖肉，飲半啖酒，不斷傾偈當食咗囉！
陳振英戒牛羊當護身符
同樣經常往返內地嘅立法會金融界議員陳振英，因為戒食牛、羊肉，等於有道護身符喺身，成功擋咗好多「特色」菜餚。
東華三院前主席施榮恆亦話，喺內地傾生意，摸酒杯底確實可以拉近雙方關係，但佢就提醒唔好睇小內地嘅酒，好似平時用嚟煮餸用嘅花雕酒，就曾經令佢大醉過。
容海恩宿醉瞓醒無頭痛
相比男士，女士飲醉就更麻煩，所以經常一個人去旅行嘅立法會議員陳淑莊就話，去到外國佢多數只飲啤酒，貪酒精濃度唔高，無咁易醉。同為女議員嘅容海恩就因為嘗試有國酒之稱嘅茅台而醉倒，但好彩係同朋友飲，所以醉咗仲有人送返屋企。佢仲讚茅台酒性雖然猛烈，但第二朝宿醉瞓醒竟然無頭痛，證明啲酒嘅品質好喎。
卓妮