我有正能量：肩父重任義教單車
相信不少人小時候最珍貴的記憶，其中一樣必定是和父母一起踩單車的片段。時至今日，都市人工作愈趨繁忙，由父母親手教子女踩單車可能已經變得罕見。全職爸爸Nelson深信單車會帶給小朋友自由及愉快童年，一年前開設Facebook專頁，免費教小朋友踩車，至今已教識逾三百四十位小朋友，不過他感慨道：「最好當然係爸爸媽媽親手教！」
免費教授一年有多，他坦言見盡「家長百態」，「有啲小朋友由爺爺帶嚟，我見背囊又係爺爺孭，水又係爺爺拎，個小朋友成個大少咁，呢啲係寵出嚟，但係好多時候，錫佢反而要學識放手。」
Nelson指，家長太寵或太嚴格均對子女不好，他的教學亦貫徹相關理念，每次向學員講解步驟和竅門後，都會先讓學員自行嘗試，如發現他們多番嘗試後仍然未能掌握，方會加以講解，「以學踩單車為例子，等大家明白人生好多嘢要學得識，第一步就係肯去試，無論家長定小朋友都係。」
父母親自教踩車 會一世難忘
雖然Nelson桃李滿門，但他內心最希望的其實是每位爸爸都能親自抽空教自己的小朋友踩單車，「呢個教嘅過程，無論對大人定個小朋友嚟講，都肯定係一個一世難忘嘅經歷，我個人覺得係非常珍貴。」不過，他亦坦言明白，作為爸爸及一家之主，既要出外工作賺錢又要陪伴子女成長，有時難免兼顧不暇，「我作為男人，幫得到當然希望盡力幫一班爸爸一把，教識佢哋嘅仔女，令佢哋覺得好似爸爸教緊佢哋一樣。」
採訪當日，Nelson便教七歲的卓諾踩單車，經半小時左右的悉心指導，卓諾已成功學懂踩單車的基本技巧。他笑言踩單車很好玩，「學識之後會叫媽咪帶我去踩單車！」
由開設專頁至今，他已訓練出三百四十九位「畢業學員」，「小朋友性格唔同可以差好遠，有啲好動啲、大膽啲嘅，半個鐘唔使就可以學識；有啲唔肯試或者驚青啲，就會耐好多。」雖然性格各有不同，但Nelson指他們學懂的那一刻，面上的笑容卻是不約而同的燦爛，「見到佢哋笑得咁開心，咩都值得啦。」
文：陳名仲
圖：關萬亨