政情：何君堯網頁加「資格」補鑊 謝偉俊唔使改？

何君堯日前已喺社交網站展示相關證書，證明自己確實有取得兩地律師資格，只係依家冇正式執業，但部分網民仍然「咬住唔放」，聲言要向本港及當地嘅相關機構投訴何。到前晚，何君堯所屬律師行嘅網頁，已靜靜雞將佢嘅個人履歷簡介由英國與新加坡「執業律師」，改寫為「執業律師資格」補鑊。

謝：睇唔到有誤導成分

另一身兼事務律師嘅獨立建制派議員謝偉俊，喺律師行網頁簡介中嘅「其他資格」下，自稱身兼「英格蘭及威爾斯律師」、「澳洲新南威爾斯最高法院大律師」同「星加坡最高法院大律師及律師」，比何君堯仲多咗一個國家，但簡介冇提及現時佢係咪喺嗰三個地區執業。

謝偉俊接受查詢時強調，佢喺簡介中只提及自己擁有相關地區嘅律師資格，冇講執業，睇唔到有誤導成分或需要修改。但佢早前接受傳媒訪問回應何君堯事件嗰陣，曾講過「應該講清楚冇執業證書，甚至唔登個資格出嚟，咁更加穩當啲」。